ISSN: 1689-6688
wtorek, 19 maja 2009
ISSN: 1689-6688
wtorek, 19 maja 2009
Wiycie jak to jest, czasym sie słyszy jakoś informacja w radiu, telewizji abo przeczyto w gazecie. Możecie wtedy pedzieć tak: jak to sie stało?
, wtoś niy dopilnowoł?
, a kaj był tyn czy tyn
, albo co poniyktórzy mogom nawet zakląć sie pod nosym. Ino wszystko to inaczy wyglądo jak sie na to patrzy przez szybka telewizora. A wiycie jak to jest, jak siedzicie se spokojnie w robocie. W stary chałpie, co do kiery mocie wątpliwości czy wszystko jest w porządku z instalacjom elektrycznom. Zanim wyjdziecie z roboty wyłączocie wszystko co sie do, bo boicie sie co by sie ino nic niy stało. I na drugi dziyń cieszycie sie, że nic sie jeszcze niy stało.
Budynek w kierym mieści sie naszo firma jest ino jedna przecznica od ulicy Składowy. Do 19 maja 2009 roku to mogło być abstrakcjom, ale w tym dniu wszystko sie zmieniło. Na ulicy Składowy w Bytomiu nad ranym wybuch wielki pożar. Zapoliło sie drzewo a jak wiadomo należy do materiałów kiere sie łatwo polom. Do dzisiej jeszcze niy wiadomo czy to było cylowe podpolynie czy jakoś inksza przyczyna. Policja z Bytomia jeszcze to ustalo.
A wy rano przychodzicie do roboty i widziecie jak te fojerwery ino wom migajom przed łoczami. Tak naprowda, to jeszcze niy wiycie co sie stało, bo idziecie od strony dworca, a przed swoim budynkiem mocie krzoki co przynajmi z ty strony wszystko zasłoniajom. Dochodzicie do budynku i bierecie głymboki oddych. Stoi. Niy widać żodnego dymu. Niy, to niy u nos. Zaczynocie sie jednak nerwować, bo przed waszom chałpom stoi takie wielkie auto i ciągnie woda. Jedne auto. Niy widzicie dymu ale w powietrzu czujecie swąd spolynizny. A może jednak tu sie coś stało ino z ty strony niy widać? Dowiadujecie, że niy u wos, że jedna ulica dali. Może to gupie ale ludzkie, cieszycie sie, że jednak niy u wos. Niy żeby komuś źle życzyć, ale jednak przynajmi chwilowo ulga.
Tak jak pedziałach siedzicie w robocie i naroz co chwila słyszycie wycie fojerwery, widzicie jak chcom wyciągnąć woda z hydrantu… a ty wody ni ma. Som żeście w ty robocie i prawie cały dziyń, nima wody, bo wtoś na szczyńście wpod na pomysł co by ta woda wziąć z miejskiego hydrantu. Potym jeszcze przez cały nastypny dziyń leciała brązowo jak rdza. Wylyź za bardzo niy umicie, bo przez jakoś chwila droga jest zatarasowano przez auta jadące do akcji. Straż, policja. Podobno żodnymu nic sie niy stało, ale tego dowiadujecie sie z radia czy wieczór z telewizji.
Co chwila wtoś przychodzi do biura i godo, że tam a tam niy idzie sie dostać, bo cało droga jest zamkniynto. Radio i media informujom, że poli się 10 metrowo gora desek. A jak som deski to pewno jeszcze coś innego tyż sie tam mogło chycić. Co gorsza dokładnie wiycie jak to wyglądo na Składowej, bo budynek waszego biura jest na takim samym placu jak tyn na Składowy. Chociaż robicie tam już pora lot tak naprowdy niy wiycie co idzie znolyźć na tym placu.
Jak godoł mój ujek: hasie – szkło – i byle co. Na pewno na tym waszym placu tyż jest drzewo. No może niy w taki ilości jak na Składowej ale jakieś by sie znolozło. Na pewno jest makulatura i jakieś inne rupiecie. Na szczyńście, z inny strony jest firma co produkuje czy sprzedaje jakieś kleje typu „Atlas”. Mocie tyż świadomość tego, że od wielkiego pożaru dzieli wos ino jedyn plac… Z drugi strony o 100 metrów som bloki w kierych miyszkajom ludzie. Przyjechaliście na 8:00 rano a jest już godzina 11:00 i wiycie, że od rana straż niy radzi sie z gaszyniym. Co chwila podjyżdżajom jakieś nowe fojerwery. A tu wystarczy, że zawieje wiater, że przydzie burza i tyn żywioł może sie rozprzestrzynić abo na te bloki abo na wasz plac. Siedzicie i niy som żeście w stanie nic zrobić, bo niy umicie pomóż, niy chce wom sie robić, bo jak robić w taki chwili. Wylyź tyż sie za bradzo niy do. A u siebie czujecie dym i swąd spolonego drzewa. I chociaż dzieli wos pora kroków od tragedii siedzicie i suchocie w radiu tego co sie dzieje, bo niy som żeście w stanie pomóc.
